Matthew 24
ព្រះយេស៊ូប្រាប់មុនអំពីការបំផ្លាញព្រះវិហារ
1កាលព្រះយេស៊ូកំពុងយាងចេញពីព្រះវិហារទៅពួកសិស្សរបស់ព្រះអង្គក៏ចូលមកជិតព្រះអង្គហើយបង្ហាញព្រះអង្គពីអគារព្រះវិហារ។ 2ព្រះអង្គមានបន្ទូលឆ្លើយទៅពួកគេថា៖ «តើអ្នករាល់គ្នាមិនឃើញរបស់ទាំងអស់នោះទេឬ? ខ្ញុំប្រាប់អ្នករាល់គ្នាជាប្រាកដថាថ្មដែលត្រួតលើគ្នានៅទីនេះនឹងត្រូវរើចោលគ្មានសល់ឡើយ»។ព្រះយេស៊ូបង្រៀនពីទីសំគាល់ថ្ងៃចុងក្រោយ
3កាលព្រះអង្គអង្គុយនៅលើភ្នំដើមអូលីវនោះពួកសិស្សបានចូលមកជិតព្រះអង្គដាច់ឡែកពីគេទូលសួរថា៖ «សូមប្រាប់យើងផងតើការទាំងនេះនឹងកើតឡើងនៅពេលណា? តើទីសំគាល់នៃការមកដល់របស់លោកនិងគ្រាចុងបញ្ចប់មានអ្វីខ្លះ?» 4ព្រះយេស៊ូមានបន្ទូលឆ្លើយទៅពួកគេថា៖ «ចូរប្រយ័ត្នកុំឲ្យអ្នកណាបោកបញ្ឆោតអ្នករាល់គ្នាបានឡើយ 5ដ្បិតមនុស្សជាច្រើននឹងមកក្នុងឈ្មោះខ្ញុំហើយថាខ្ញុំនេះហើយជាព្រះគ្រិស្ដពួកគេនឹងបោកបញ្ឆោតមនុស្សជាច្រើន។ 6អ្នករាល់គ្នានឹងឮពីសង្គ្រាមនិងដំណឹងអំពីសង្គ្រាមប៉ុន្ដែចូរប្រយ័ត្នកុំជ្រួលច្របល់អីព្រោះការទាំងអស់នេះត្រូវតែកើតឡើងប៉ុន្ដែមិនទាន់ដល់ទីបញ្ចប់ទេ 7ដ្បិតជនជាតិមួយនឹងក្រោកឡើងទាស់នឹងជនជាតិមួយប្រទេសមួយទាស់នឹងប្រទេសមួយព្រមទាំងមានគ្រោះអត់ឃ្លាននិងការរញ្ជួយដីច្រើនកន្លែង 8ទាំងអស់នេះជាការចាប់ផ្ដើមនៃទុក្ខវេទនាដ៏សម្បើមដូចស្ដ្រីហៀបនឹងសម្រាលកូន 9បន្ទាប់មកពួកគេនឹងប្រគល់អ្នករាល់គ្នាទៅឲ្យមានសេចក្ដីវេទនារួចពួកគេនឹងសម្លាប់អ្នករាល់គ្នាហើយជនជាតិទាំងអស់នឹងស្អប់អ្នករាល់គ្នាដោយព្រោះឈ្មោះខ្ញុំ 10នៅពេលនោះមនុស្សជាច្រើននឹងជំពប់ដួលពួកគេក្បត់គ្នាទៅវិញទៅមកហើយស្អប់គ្នាទៅវិញទៅមក។ 11អ្នកនាំព្រះបន្ទូលក្លែងក្លាយជាច្រើននឹងក្រោកឡើងហើយពួកគេនឹងបោកបញ្ឆោតមនុស្សជាច្រើន។ 12ព្រោះតែសេចក្ដីទុច្ចរិតកើនឡើងនោះសេចក្ដីស្រលាញ់របស់មនុស្សជាច្រើននឹងរសាយទៅ 13តែអ្នកដែលស៊ូទ្រាំដល់ទីបំផុតអ្នកនោះនឹងទទួលបានសេចក្ដីសង្គ្រោះ។ 14ដំណឹងល្អអំពីនគរព្រះជាម្ចាស់នេះនឹងត្រូវប្រកាសទូទាំងពិភពលោកទុកជាទីបន្ទាល់មួយដល់ជនជាតិទាំងអស់បន្ទាប់មកទៀតទីបញ្ចប់ក៏មកដល់។ 15ដូច្នេះនៅពេលអ្នករាល់គ្នាឃើញអំពើបំផ្លិចបំផ្លាញដ៏លាមកកើតឡើងនៅទីបរិសុទ្ធដូចដែលបានថ្លែងទុកតាមរយៈលោកដានីយ៉ែលជាអ្នកនាំព្រះបន្ទូល។ នោះចូរឲ្យអ្នកអានយល់ចុះ។ 16នៅពេលនោះចូរឲ្យពួកអ្នកនៅស្រុកយូដាភៀសខ្លួនទៅភ្នំចុះ 17ហើយកុំឲ្យអ្នកនៅលើដំបូលផ្ទះចុះមកក្រោមយករបស់របរពីក្នុងផ្ទះរបស់គាត់ឲ្យសោះ។ 18កុំឲ្យអ្នកនៅស្រែចម្ការបកក្រោយទៅយកអាវគាត់ឲ្យសោះ។ 19នៅគ្រានោះពួកស្ដ្រីមានផ្ទៃពោះនិងពួកស្ដ្រីកំពុងបំបៅកូននឹងវេទនាណាស់។ 20ដូច្នេះចូរអធិស្ឋានដើម្បីកុំឲ្យការរត់គេចរបស់អ្នករាល់គ្នាកើតឡើងនៅរដូវរងាឬថ្ងៃសប្ប័ទឡើយ 21ពីព្រោះនៅពេលនោះនឹងមានទុក្ខវេទនាដ៏សម្បើមគឺមិនដែលមានទុក្ខវេទនាបែបនេះឡើយចាប់តាំងពីដើមកំណើតពិភពលោករហូតមកដល់ពេលនេះហើយក៏នឹងមិនកើតឡើងទៀតដែរ 22ហើយដរាបណាព្រះអម្ចាស់មិនបង្រួញថ្ងៃទាំងនោះទេនោះគ្មានមនុស្សណាម្នាក់បានទទួលសេចក្ដីសង្គ្រោះឡើយប៉ុន្ដែព្រះអង្គបង្រួញថ្ងៃទាំងនោះសម្រាប់អស់អ្នកដែលព្រះអង្គបានជ្រើសរើស 23នៅពេលនោះប្រសិនបើមាននរណាម្នាក់ប្រាប់អ្នករាល់គ្នាថាមើល៍នែព្រះគ្រិស្ដនៅទីនេះឬនៅទីនោះចូរកុំជឿឲ្យសោះ 24ព្រោះពួកមនុស្សដែលក្លែងជាព្រះគ្រិស្ដនិងពួកអ្នកនាំព្រះបន្ទូលក្លែងក្លាយជាច្រើននឹងក្រោកឡើងហើយគេនឹងសំដែងទីសំគាល់ដ៏អស្ចារ្យនិងការអស្ចារ្យដើម្បីបោកបញ្ឆោតសូម្បីអស់អ្នកដែលត្រូវបានជ្រើសរើសប្រសិនបើអាចធ្វើបាននោះ។ 25មើល៍ខ្ញុំបានប្រាប់អ្នករាល់គ្នាជាមុនរួចហើយ 26ដូច្នេះបើគេប្រាប់អ្នករាល់គ្នាថាព្រះអង្គនៅទីរហោឋាននោះកុំចេញទៅឲ្យសោះឬថាមើល៍ព្រះអង្គនៅក្នុងបន្ទប់នោះកុំជឿឲ្យសោះ 27ដ្បិតកូនមនុស្ស ▼▼«កូនមនុស្ស» ជាងារដែលប្រើសម្រាប់តែព្រះយេស៊ូប៉ុណ្ណោះ នៅក្នុងគម្ពីរសញ្ញាថ្មី។ មាននៅក្នុង ២៤:៣០,៣៧,៣៩,៤៤ ដែរ។
នឹងមកដូចជាផ្លេកបន្ទោរជះពន្លឺពីទិសខាងកើតដល់ទិសខាងលិច 28ទីណាមានសាកសពសត្វត្មាតប្រមូលផ្ដុំគ្នានៅទីនោះ។ ការយាងមកលើកទីពីររបស់ព្រះយេស៊ូគ្រិស្ដ
29ប៉ុន្ដែនៅក្រោយគ្រាទុក្ខវេទនាទាំងនោះភ្លាមថ្ងៃនឹងអាប់រស្មីហើយលោកខែនឹងមិនបញ្ចេញពន្លឺទៀតទេឯផ្កាយទាំងឡាយនឹងធ្លាក់ចុះពីលើមេឃហើយអំណាចនៅស្ថានសួគ៌នឹងរង្គោះរង្គើ។ 30នៅពេលនោះទីសំគាល់របស់កូនមនុស្សនឹងលេចមកនៅលើមេឃឯកុលសម្ព័ន្ធទាំងអស់នៅលើផែនដីនឹងកាន់ទុក្ខហើយពួកគេនឹងឃើញកូនមនុស្សមកនៅលើពពកនាអាកាសប្រកបដោយអំណាចនិងសិរីរុងរឿងដ៏អស្ចារ្យ។ 31លោកនឹងចាត់ពួកទេវតារបស់លោកដោយសំឡេងត្រែលាន់រំពងហើយពួកទេវតានឹងប្រមូលអស់អ្នកដែលលោកបានជ្រើសរើសទាំងបួនទិសគឺពីជើងមេឃម្ខាងរហូតដល់ជើងមេឃម្ខាងទៀត។ 32ចូររៀនពីរឿងប្រៀបប្រដូចអំពីដើមល្វាចុះកាលណាមែកវាទន់ហើយស្លឹកវាលាស់ឡើងនោះអ្នករាល់គ្នាដឹងថារដូវក្ដៅជិតមកដល់ហើយ 33ដូច្នេះកាលណាអ្នករាល់គ្នាឃើញហេតុការណ៍ទាំងអស់នេះកើតឡើងនោះអ្នករាល់គ្នាដឹងថាពេលវេលាកាន់តែកៀកបំផុតហើយ។ 34ខ្ញុំប្រាប់អ្នករាល់គ្នាជាប្រាកដថាមនុស្សជំនាន់នេះនឹងមិនស្លាប់អស់ឡើយលុះត្រាតែហេតុការណ៍ទាំងអស់នេះកើតឡើងសិន។ 35ផ្ទៃមេឃនិងផែនដីនឹងរលាយបាត់ទៅប៉ុន្ដែពាក្យរបស់ខ្ញុំនឹងមិនរលាយបាត់សោះឡើយ។គ្មានអ្នកណាដឹងពីពេលវេលាដែលព្រះយេស៊ូត្រលប់មកវិញ
36ឯពេលវេលានិងថ្ងៃកំណត់ក្រៅពីព្រះវរបិតាតែមួយអង្គគត់គ្មានអ្នកណាម្នាក់ដឹងឡើយសូម្បីតែពួកទេវតានៅស្ថានសួគ៌ឬព្រះរាជបុត្រា 37ដ្បិតនៅសម័យលោកណូអេមានកើតឡើងជាយ៉ាងណាកូនមនុស្សនឹងមកជាយ៉ាងនោះដែរ។ 38សម័យនោះមុនមានទឹកជំនន់ពួកគេស៊ីផឹកនិងរៀបការជាប្ដីប្រពន្ធរហូតដល់ថ្ងៃលោកណូអេចូលក្នុងទូកធំ 39គឺពួកគេមិនបានដឹងទាល់តែសោះរហូតដល់ទឹកជំនន់មកដល់ក៏ហូរនាំអ្វីៗទាំងអស់ទៅឯការមកដល់របស់កូនមនុស្សក៏នឹងកើតឡើងជាយ៉ាងនោះដែរ។ 40នៅពេលនោះបុរសពីរនាក់នៅស្រែចម្ការម្នាក់នឹងត្រូវដកយកទៅហើយម្នាក់ទៀតនឹងត្រូវទុកនៅទីនោះ 41ឯស្ដ្រីពីរនាក់កំពុងកិនស្រូវម្នាក់នឹងត្រូវដកយកទៅហើយម្នាក់ទៀតនឹងត្រូវទុកនៅទីនោះ។ 42ដូច្នេះចូរប្រុងស្មារតីព្រោះអ្នករាល់គ្នាមិនដឹងថាព្រះអម្ចាស់របស់អ្នករាល់គ្នានឹងមកនៅថ្ងៃណាទេ 43ចូរអ្នករាល់គ្នាដឹងការនេះចុះថាបើម្ចាស់ផ្ទះដឹងថាចោរនឹងមកនៅពេលណាមួយនោះគាត់មុខជាមិនដេកទេហើយមិនបណ្ដោយឲ្យវាគាស់ផ្ទះរបស់គាត់បានឡើយ 44ហេតុនេះហើយចូរអ្នករាល់គ្នាប្រុងប្រៀបដូច្នេះដែរព្រោះអ្នករាល់គ្នាស្មានមិនត្រូវទេថាកូនមនុស្សមកនៅពេលណា។ព្រះយេស៊ូប្រទានរង្វាន់ដល់អស់អ្នកស្មោះត្រង់
45ដូច្នេះតើអ្នកណាជាបាវបម្រើដ៏ស្មោះត្រង់ហើយឆ្លាតដែលចៅហ្វាយបានតែងតាំងឲ្យមើលខុសត្រូវលើបាវបម្រើនៅក្នុងផ្ទះដើម្បីចែកអាហារឲ្យពួកគេតាមពេលវេលា? 46មានពរហើយបាវបម្រើណាដែលចៅហ្វាយមកដល់ហើយឃើញកំពុងធ្វើយ៉ាងដូច្នោះ 47ខ្ញុំប្រាប់អ្នករាល់គ្នាជាប្រាកដថាគាត់នឹងតែងតាំងអ្នកនោះឲ្យមើលខុសត្រូវលើទ្រព្យសម្បត្ដិរបស់គាត់ទាំងអស់ 48ប៉ុន្ដែប្រសិនបើបាវបម្រើនោះអាក្រក់វិញនោះវាគិតក្នុងចិត្ដថាចៅហ្វាយរបស់អញក្រមកណាស់ 49នោះវាក៏ចាប់ផ្ដើមវាយបាវបម្រើឯទៀតៗជាគូកនរបស់វាព្រមទាំងស៊ីផឹកជាមួយពួកអ្នកប្រមឹក 50ហើយចៅហ្វាយរបស់វានឹងមកវិញនៅថ្ងៃដែលវាស្មានមិនដល់និងនៅម៉ោងដែលវាមិនដឹងទាល់តែសោះ 51ចៅហ្វាយនឹងកាត់វាជាពីរកំណាត់រួចដាក់វាឲ្យនៅរួមជាមួយនឹងពួកមនុស្សមានពុតហើយនៅទីនោះមានតែការទ្រហោយំនិងការសង្កៀតធ្មេញ។
Copyright information for
KhmKCB